दैलेखमा चट्याङ पूर्व सूचना प्रणाली जडानको माग

समाज

गृहपृष्ठ
समाज
दैलेखमा चट्याङ पूर्व सूचना प्रणाली जडानको माग

दैलेखमा चट्याङ पूर्व सूचना प्रणाली जडानको माग

सोमबार, वैशाख २२, २०८२ मिडिया जर्नल

काठमाडौँ । प्रतिनिधिसभा सदस्य सिता कुमारी रानाले चट्याङबाट उच्च जोखिममा रहेको दैलेख जिल्लामा चट्याङ पूर्वसूचना प्रणाली जडान गर्न सरकारको ध्यानाकर्षण गराएकी छन् ।

सोमबारको प्रतिनिधिसभा बैठकमा बोल्दै सांसद रानाले दैलेख नेपालको चट्याङ धेरै पर्ने जिल्लामध्ये एक भएकाले चट्याङ लाग्ने निश्चित भू-भागको वैज्ञानिक अध्ययन आवश्यक रहेको बताइन् ।

उनका अनुसार हरेक वर्ष दैलेखमा चट्याङका कारण ४–५ जनाको मृत्यु हुने र दर्जनौँ नागरिक घाइते हुने गरेका छन् । सांसद रानाले गत चैत्र ८ गते दुल्लु नगरपालिका–६ मा १८ वर्षीय एसईई परीक्षार्थी गगन खड्काको चट्याङ लागेर मृत्यु भएको र चैत्र २० गते नौमुले गाउँपालिका–८ का ३१ वर्षीय दशरथ शाहीको चट्याङबाट ज्यान गएको घटनाको स्मरण गराएकी थिइन् । दशरथ शाहीका साथमा रहेका उनकी २७ वर्षीया श्रीमती विपना सिंह, ११ वर्षीया छोरी र तीन वर्षीय छोरा घाइते भएका थिए।

दैलेखको केही निश्चित भूभागमा पटक–पटक चट्याङ पर्ने गरेको देखिन्छ । यो किन त्यस्तो हुन्छ भन्नेबारे वैज्ञानिक अध्ययन र अनुसन्धान आवश्यक छसांसद रानाले भनिन्, “साथै, चट्याङको पूर्वसूचना दिने सेन्सरसहितको यन्त्र जडान गरी जनताको जीवन रक्षा गर्न आवश्यक छ।”

उनले चट्याङपीडितलाई उचित राहत, उपचार र संरक्षणको व्यवस्था मिलाउन पनि सरकारसँग माग गरिन् । सांसद रानाले चट्याङ पूर्वसूचना प्रणाली मकवानपुरको राक्सिराङ गाउँपालिकामा जडान गरिएको उदाहरण प्रस्तुत गर्दै दैलेखजस्ता उच्च जोखिमयुक्त क्षेत्रमा पनि सोही प्रविधि तत्काल स्थापना गर्नुपर्ने आवश्यकता औँल्याइन् ।

प्रकाशित मिति: सोमबार, वैशाख २२, २०८२ १२:०१