सुरक्षा/अपराध

गृहपृष्ठ
सुरक्षा/अपराध
भारतबाट फर्किने क्रममा हत्या गरिएका युवकका दुई आरोपी पाँच वर्षपछि पक्राउ

भारतबाट फर्किने क्रममा हत्या गरिएका युवकका दुई आरोपी पाँच वर्षपछि पक्राउ

सोमबार, असार ९, २०८२ मिडिया जर्नल

काठमाडौँ । अछामको रामारोशन गाउँपालिका–६ का दुई युवालाई पाँच वर्षअघिको कर्तव्य ज्यान मुद्दामा प्रहरीले पक्राउ गरेको छ। पक्राउ पर्नेमा ३६ वर्षीय झपड साउँद र ३४ वर्षीय कुले साउँद रहेका छन्।

२०७८ साल कार्तिक २१ गते भारतबाट फर्किरहेका गगन साउँदको रामारोशन–६ कै सल्लाघारीमा हत्या भएको अवस्थामा शव फेला परेको थियो। घटनालगत्तै फरार रहेका झपड र कुले साउँदलाई आइतबार साँझ प्रहरीले रामारोशनकै भाटाकाटियाबाट पक्राउ गरेको हो।

प्रहरीका अनुसार हत्या भएको दिन गगन साउँद आफ्नो गाउँ फर्किंदै थिए। बाटोमै झपड र कुलेसँग भेट भएपछि उनीहरूले सँगै मदिरा सेवन गरेका थिए। त्यसक्रममा गगनले श्रीमतीलाई फोन गरी "झपड र कुलेसँग भेट भएको छ, नास्ता खाएर आउँछु" भनेका थिए।

तर गगन घर फर्केनन्। खोजीका क्रममा उनको शव सल्लाघारीमा फेला परेको थियो। सुरुवाती रूपमा घटना लडेर मृत्यु भएको भन्दै ढाकछोप गरियो। पछि गगनकी श्रीमतीले प्रहरीमा जाहेरी दिएकी थिइन्।

पक्राउ परेका दुबैजनामाथि थप अनुसन्धान भइरहेको जिल्ला प्रहरी कार्यालय अछामका डिएसपी ईश्वरीप्रसाद भण्डारीले जानकारी दिए।

प्रकाशित मिति: सोमबार, असार ९, २०८२ १३:०६

प्रतिक्रिया दिनुहोस्