काठमाडौँ । निरन्तर वर्षाका कारण पूर्व–पश्चिम राजमार्गअन्तर्गत बुटवल–नारायणगढ खण्डको दुम्कीवास क्षेत्रमा मुख्य सडकसँगै वैकल्पिक मार्ग पनि पूर्ण रूपमा अवरुद्ध भएको छ। यससँगै दाउन्ने–दुम्कीवास सडकखण्डमा सवारी आवागमन पूर्ण रूपमा ठप्प भएको छ।
विनयी त्रिवेणी गाउँपालिका–१ दुम्कीवासमा अवस्थित पुल भाँचिएपछि अस्थायी डाइभर्सनमार्फत यातायात सञ्चालन हुँदै आएको थियो। तर, डाइभर्सन पनि वर्षाले बगाएपछि साना तथा मध्यम सवारीसाधनलाई वैकल्पिक भित्री मार्ग — होङ्सी गेट, सर्दी, र ज्यामिरे मार्ग — हुँदै सञ्चालन गरिँदै आएको थियो। यद्यपि, आज बिहानदेखि खरङ्गे खोलामा अत्यधिक बहावका कारण त्यो वैकल्पिक मार्गसमेत पूर्ण रूपमा बन्द भएको हो।
जिल्ला प्रहरी कार्यालय, नवलपरासीका प्रहरी उपरीक्षक यादव ढकालका अनुसार, अत्यधिक पानीको बहावका कारण वैकल्पिक मार्गसमेत प्रयोग गर्न नसकिने भएपछि अहिले सम्पूर्ण सवारी आवागमन रोकिएको छ। यात्रुहरू अलपत्र परेका छन् भने आपूर्ति सामग्री ढुवानीमा समेत समस्या भएको छ।
स्थानीय निकाय, सुरक्षा निकाय र सडक विभागले समस्या समाधानका लागि प्रयास गरिरहेका छन्। तर, अस्थायी डाइभर्सनहरूमा भरपर्दो संरचना नहुँदा र मौसममा सुधार नआएसम्म तत्काल समस्या समाधान हुने सम्भावना न्यून देखिन्छ।
स्थानीय प्रशासनले यात्रुहरूलाई सुरक्षित स्थानमै बस्न आग्रह गर्दै वैकल्पिक मार्गहरू सञ्चालनमा ल्याउनसम्बन्धी पूर्वतयारीमा जुटिरहेको जनाएको छ।
-1745569687.jpg)
-1744612211.jpg)
