ललितपुर । सञ्चार रजिष्ट्रारको कार्यालय बागमति प्रदेशले पहिलोपटक पत्रकारको कार्यक्षेत्रमै पुगेर पत्रकार परिचयपत्र वितरण तथा नविकरण गर्न सुरुवात गरेको छ ।
सञ्चार रजिष्ट्रारको कार्यालय बागमति प्रदेशको आयोजना नेपाल पत्रकार महासंघ रामेछाप शाखाको समन्वयमा परिचयपत्र वितरण तथा नविकरण गरिएको हो ।
सञ्चार रजिष्ट्रारको कार्यालयले शुक्रवार मन्थलीमा आयोजित कार्यक्रममार्फत रामेछापमा क्रियाशील २६ जना पत्रकारलाई परिचयपत्र वितरण तथा नविकरण गरिएको सञ्चार रजिष्ट्रार कार्यालयका सुचना अधिकारी शर्मिली ककर्माचार्यले जानकारी दिइन् ।
उनका अनुसार २५ जना पत्रकारको नयाँ परिचयपत्र र १ जनाको नविकरण गरिएको छ । हामीले पहिलोपटक पत्रकारको कार्यक्षेत्रमै पुगेर पत्रकार परिचय पत्र वितरण तथा नविकरण थालेका छौँ,'उनले भनिन्, 'सुरुवात रामेछापको मन्थलीबाट गरेका छौँ, आवश्यक्ता अनुसार बागमति प्रदेशको अन्य ठाउँमा पनि गछौँ ।'
पछिल्लो समय सञ्चार रजिष्ट्रार कार्यालयले समाचार संकलन, लेखन, सम्पादन तथा प्रविधिमैत्री पत्रकारितालाई प्रवर्द्धन गर्न विभिन्न तालिम तथा गोष्ठीको गर्दै आइरहेको छ।
समाचार संकलन, लेखन,सम्पादन, श्रव्यदृश्य समाचार सामग्री उत्पादन गर्न, तथ्यांकको प्रस्तुतीसहित अनलाइन पत्रकारिता गर्न र बजार व्यवस्थापन सम्बन्धी तालिमहरु आयोजना गर्दै आएको सञ्चार रजिष्ट्रारको कार्यालयका सञ्चार रजिष्ट्रार रेवती प्रसाद सापकोटाले बताए ।
साथै सञ्चार रजिष्ट्रारको कार्यालयले आफनो सेवा प्रवाहलाई सम्बन्धित सेवाग्राहीको कर्मक्षेत्रमै पुगेर उपलब्ध गराउन थालेको रजिष्ट्रार सापकोटाको भनाई छ । ।
कार्यक्रम सफल बनाउन योगदान दिने नेपाल पत्रकार महासंघ रामेछाप शाखा, रामेछापमा कार्यरत पत्रकारहरू तथा सेवाप्रवाहलाई सहज बनाउन खटिएका सञ्चार रजिष्ट्रार कार्यालयका कर्मचारीहरूलाई उनले विशेष धन्यवाद दिए ।
अझ आगामी दिनहरुमा पनि यस्ता सेवा प्रवाहलाई निरन्तरता दिइने प्रतिबद्धता सञ्चार रजिष्ट्रार कार्यालयले व्यक्त गरेको छ।
