सडक संघर्षमा प्रचण्ड–माधव

राजनीति

गृहपृष्ठ
राजनीति
सडक संघर्षमा प्रचण्ड–माधव

सडक संघर्षमा प्रचण्ड–माधव संसद विघटनविरुद्ध परेका निवेदनको आजै सुनुवाइ हुने

शुक्रबार, पुस १०, २०७७ मिडिया जर्नल

सडक संघर्षमा प्रचण्ड–माधव

ललितपुर, १० पुस । प्रचण्ड–माधव पक्षले संसद विघटनविरुद्ध आजबाट सडक आन्दोलन चर्काउने भएको छ । बिहीबार सम्पन्न केन्द्रीय समिति बैठकको निर्णयअनुसार प्रचण्ड माधव पक्ष आज शुक्रबारबाट सडक संघर्षमा उत्रिएको हो ।
त्यसक्रममा १० बजे माइतिघर मण्डलामा आफ्नो पक्षका सांसदसहित नेता कार्यकर्ता भेला भएर सर्वोच्च अदालत जाँदैछन् । सर्वोच्च अदालतको संवैधानिक इजलासमा आजै संसद विघटनविरुद्ध परेका निवेदनको सुनुवाइ हुँदैछ ।
संविधानविपरित संसद विघटन गरेको भन्दै सर्वोच्चले उक्त मुद्दामा अन्तरिम आदेश दिनुपर्ने सो प्रचण्ड माधव पक्षका कानुन व्यवसायीको माग छ । यसैगरी शुक्रबारै प्रचण्ड माधव पक्षका केन्द्रीय सदस्यहरु सामुहिक रुपमा निर्वाचन आयोग पनि जादैछन् । आयोगमा पुगेर उनीहरुले नेकपाको आधिकारिकता आफुहरुमै रहेको अवगत गराउने छन् ।

विभाजनसँगै नेकपा प्रचण्ड माधव पक्षको हुने वा केपी ओली पक्षको भन्ने प्रश्न उठ्न पुगेको छ । दुवै पक्षले आफुलाई आधिकारिक भएको बताउँदै आएका छन् । यद्यपि नेकपा गठन हुँदाको मौजुदा केन्द्रीय समितिका बहुमत सदस्यहरु प्रचण्ड माधव पक्षमा छन् । उनीहरुले त्यसको प्रमाण निर्वाचन आयोगमा पेश गरिसकेका छन् ।

सर्वोच्च अदालत र निर्वाचन आयोग पुगेपछि आजै अपरान्ह २ बजे अध्यक्षद्वय पुष्पकमल दाहाल प्रचण्ड र माधवकुमार नेपालले कार्की व्याङ्क्वेट थापाथलीमा पत्रकार सम्मेलनको आयोजना गर्ने छन् ।

प्रचण्ड–माधव पक्षको बिहीबार सम्पन्न केन्द्रीय कमिटी बैठकले आन्दोलनको कार्यक्रम सार्वजनिक गरेको थियो । उक्त कैठकले प्रवक्ता नारायणकाजी श्रेष्ठको नेतृत्वमा २५०१ सदस्यीय संघर्ष समिति गठन पनि गरेको छ ।

जसअनुसार पुस १० गते ९ः३० बजे सबै केन्द्रीय सदस्य, सासंदहरूलगायत माइतीघर मण्डलमा जम्मा भएर १२ बजे निर्वाचन आयोग जाने कार्यक्रम तय भएको छ । त्यसपछि दिउँसो २ बजे कार्की क्याङ्क्वेटमा पत्रकार सम्मेलन गरिने छ ।

संघर्षका कार्यक्रमअनुसार एक साताभित्र प्रदेशहरूको बैठक सम्पन्न गर्ने र १४ गतेभित्र जनसंगठनका भेला बैठक सम्पन्न गर्ने कार्यक्रम सार्वजनिक भएका छन् । पुस १२ गते ७७ जिल्लाको भेला र बैठक पछि १४ गते ७७ वटै जिल्लामा प्रतिगमनविरुद्ध प्रदर्शन गर्ने यो समुहको तयारी छ ।
केन्द्रबाट सुरु भएको प्रचण्ड माधव नेपाल पक्षको संघर्ष स्थानीय तहसम्मै लैजाने तयारी छ । जसमा पुस २० गतेभित्र नगर र गाउँपालिकासम्म बैठक, भेला गर्ने र २५ गतेभित्र वडाहरूमा बैठक भेला सम्पन्न गर्ने कार्यक्रम सार्वजनिक भएका छन् ।

पुस ५ गते प्रधानमन्त्री केपी शर्मा ओलीले संसद विघटन गरेपछि नेकपा दुई धु्रवमा विभाजित भएको हो । संसद विघटनको बचाउ गर्दै प्रधानमन्त्री ओलीले एक पक्षको नेतृत्व गरेका छन् भने त्यसको विरोधमा उत्रिएको प्रचण्ड माधव पक्षले असंवैधानिक कदम खारेज हुनुपर्ने भन्दै छुट्टाछुट्ै बैठक र कार्यक्रम सार्वजनिक गरिसकेको रातोपाटिले लेखेको छ ।