चितवनमा लामिछानेसहित १४ जनाविरुद्ध ठगी तथा संगठित अपराध मुद्दा दर्ता हुँदै

राजनीति

गृहपृष्ठ
राजनीति
चितवनमा लामिछानेसहित १४ जनाविरुद्ध ठगी तथा संगठित अपराध मुद्दा दर्ता हुँदै

चितवनमा लामिछानेसहित १४ जनाविरुद्ध ठगी तथा संगठित अपराध मुद्दा दर्ता हुँदै

सोमबार, माघ २१, २०८१ मिडिया जर्नल

चितवन । साहारा चितवन बहुउद्देश्यीय सहकारी संस्था लिमिटेडमा आर्थिक अनियमितताको आरोपमा पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछानेसहित १४ जना तथा ६ वटा संस्थाविरुद्ध चितवन जिल्ला अदालतमा आज मुद्दा दर्ता हुने भएको छ।

चितवन जिल्ला सरकारी वकिल कार्यालय स्रोतका अनुसार प्रहरीले पेश गरेको पूरक अनुसन्धान प्रतिवेदनको अध्ययनपछि रविसहितलाई ठगी तथा संगठित अपराध कसुरमा मुद्दा दर्ता गर्न लागिएको हो। यस मामिलामा गोर्खा मिडिया प्रालि, साहारा बचत तथा अन्य चार संस्थालाई पनि प्रतिवादीको रूपमा समावेश गरिएको छ।

यसअघि रवि लामिछाने विभिन्न सहकारी अनियमितताका घटनामा जोडिएका थिए। कास्कीको सूर्यदर्शन सहकारी प्रकरणमा उनी ६५ लाख रुपैयाँ धरौटीमा छुटेका थिए, काठमाडौंको स्वर्णलक्ष्मी सहकारीमा ६० लाख धरौटी तिरेका थिए, भने रुपन्देहीको सुप्रिम सहकारी प्रकरणमा १ करोड रुपैयाँ धरौटीमा मुक्त भएका थिए।

प्रहरीले यसअघि पठाएको पहिलो अनुसन्धान प्रतिवेदनमा थप अनुसन्धान आवश्यक रहेको भन्दै सरकारी वकिल कार्यालयले फाइल फिर्ता पठाएको थियो। तर, पूरक निवेदनसहित प्रहरीले साहारा सहकारीको ४३ लाख ९४ हजार ६ सय ३१ रुपैयाँ फिर्ताको माग गरेको छ। अनुसन्धान प्रतिवेदनअनुसार, सो सहकारीमार्फत कुल ३८ करोड ९ लाख ७९ हजार रुपैयाँ हिनामिना भएको दाबी गरिएको छ, भने कम्पनीहरूको हकमा करिब ५६ करोड २२ लाख ५० हजार रुपैयाँ बिगो देखाइएको छ।

यस मुद्दाले नेपालका सहकारी क्षेत्रका अनियमितता तथा आर्थिक अपराधसम्बन्धी विषयमा ठूलो बहस सिर्जना गर्ने अपेक्षा गरिएको छ।

प्रकाशित मिति: सोमबार, माघ २१, २०८१ १४:०३

प्रतिक्रिया दिनुहोस्