फेरि लकडाउनको माग, कोरोना संक्रमितमा लक्षण देखिन थाल्यो

समाज

गृहपृष्ठ
समाज
फेरि लकडाउनको माग, कोरोना संक्रमितमा लक्षण देखिन थाल्यो

फेरि लकडाउनको माग, कोरोना संक्रमितमा लक्षण देखिन थाल्यो संक्रमितमध्ये २० प्रतिशतमा लक्षण

बिहीबार, साउन १५, २०७७ मिडिया जर्नल

फेरि लकडाउनको माग, कोरोना संक्रमितमा लक्षण देखिन थाल्यो

ललितपुर, १५ साउन । केहीसाता देखि लक्षण सहितका कोरोना संक्रमितको संख्या बढ्दै गएको छ । बुधबारसम्मको तथ्यांकमा प्रदेश २ मा ३६१ महिलासहित ४ हजार ५ सय ४४ जना संक्रमित देखिएका छन् । संक्रमितमध्ये १२ जनाको मृत्यु भएको छ ।

कुल २६ हजार ४ सय ७ जनाको स्वाब संकलन गरीएको थियो । जसमध्ये २ हजार ५२१ जनाको नतिजा आउन बाँकी छ । बुधबार मात्रै सामाजिक विकास मन्त्रालयका तीनजना कर्मचारीमा समेत संक्रमण देखिएको छ ।

पहिला बिना लक्षणका संक्रमित देखिए पनि अहिले प्रदेशमा कोरोनाको लक्षणसहितका संक्रमितहरु देखिन थालेका छन् । लक्षणसहितको संक्रमण एकाएक बढ्न थालेको प्रदेश स्वास्थ्य निर्देशनालयले बताएको छ।

समुदाय स्तरमा नै संक्रमणको जोखिम बढ्न थालेपछि फेरि लकडाउनमा जानुपर्ने स्थिति आउन लागेको विज्ञले बताएका छन् । यसअघि ‘इम्यूनिटी पावर’ राम्रो रहेकाले किशोर तथा युवा उमेरका व्यक्ति संक्रमित नहुने चर्चा भए पनि अहिले जुनसुकै उमेरसमूहका व्यक्ति संक्रमित हुन थालेको विज्ञहरु बताउछन् ।

धनुषाको शहीद नगरपालिका वडा नम्बर ८, डुमरियाका ३८ वर्षीय पुरुषको कोरोना संक्रमित भएर मृत्यु भएको घटनाले यहाँ जुनसुकै उमेर समूहका व्यक्ति कोरोना संक्रमित भइरहेको देखाउँछ । ती पुरुषमा अधिक कोरोना भाइरसको मात्रा देखिएको थियो ।

प्रदेश सरकारले कोरोना भाइरस सम्बन्धी सुझाव दिन बनाएको विज्ञ समूहका चिकित्सक डा. रामकेवल दास पनि प्रदेशमा देखिएका संक्रमितमध्ये १५ देखि २० प्रतिशतमा लक्षण देखिन थालेको बताउँछन् । ‘अहिले संक्रमितको स्वरुप बदलिएको छ,’ ‘पहिला कोही बाहिरबाट संक्रमित भएर आउँथे र उनको जाँच गरी आइसोलेसनमा राखिन्थ्यो, अहिले भने समुदायस्तरमै लक्षणसहितको भाइरस देखिन थालेको छ ।’

यो समयमा गम्भीरतापूर्वक ध्यान नदिए र सावधानी नअपनाए ठूलो मूल्य चुकाउनुपर्ने देखिन्छ । यसका निम्ति तीनवटै तहको सरकारले चनाखो हुँदै तयारी गर्नुपर्ने उनको सुझाव छ ।

सर्वसाधारणले पनि आफ्नो बानी, व्यवहारमा परिवर्तन ल्याउनु जरुरी छ । “अन्यथा कोरोना संक्रमणले समुदाय स्तरमा नै भयावह स्थिति सिर्जना हुनसक्छ ।”

समुदायस्तरमा फैलिएको संक्रमणलाई रोक्नु जरुरी रहेको विज्ञहरु बताउँछन् । यसलाई नियन्त्रण गर्न सबैभन्दा पहिला परीक्षणको दायरा बढाउन उनीहरु सल्लाह दिन्छन् ।

‘परीक्षणको दायरा बढाऔं, संक्रमित देखिनेवित्तिकै उनलाई आइसोलेसनमा राखेर उनको सम्पर्कमा आएकाको खोजी गरी जाँच गरौं र संक्रमित भएको ठाउँलाई सिल गरौं,’ ‘यसरी गर्दा संक्रमणलाई नियन्त्रण गर्न सकिन्छ ।’