सर्केगाडमा उपनिर्वाचनका लागि निर्वाचन अधिकृतको कार्यालय स्थापना

राजनीति

गृहपृष्ठ
राजनीति
सर्केगाडमा उपनिर्वाचनका लागि निर्वाचन अधिकृतको कार्यालय स्थापना

सर्केगाडमा उपनिर्वाचनका लागि निर्वाचन अधिकृतको कार्यालय स्थापना

शनिबार, मंसिर १, २०८१ मिडिया जर्नल

हुम्ला । हुम्लाको मध्य भेगमा रहेको सर्केगाड गाउँपालिकामा आगामी मङ्सिर १६ गते हुन लागेको उपाध्यक्ष पदको स्थानीय तह उपनिर्वाचनका लागि शुक्रबार निर्वाचन अधिकृतको कार्यालय स्थापना भएको छ। हुम्लाका जिल्ला न्यायाधीश तथा मुख्य निर्वाचन अधिकृत शम्भुप्रसाद बरालले औपचारिक रुपमा निर्वाचन कार्यालयको उद्घाटन गरेका हुन्।

निर्वाचन आयोगले सार्वजनिक गरेको निर्वाचन कार्य तालिकाअनुसार नै शुक्रबार मुख्य निर्वाचन अधिकृतको कार्यालय स्थापना गरिएको हो। निर्वाचनको कार्य तालिकाअन्तर्गत मंसिर २ गते उम्मेदवारी मनोनयन दर्ता गरिने मुख्य निर्वाचन अधिकृत बरालले बताए।

निर्वाचन कार्य तालिकाअनुसार उम्मेदवारी दर्ताको समय १० देखि ५ बजेसम्म हुनाका साथै सोही दिन नै उम्मेदवारको सूची सार्वजनिक हुने भएको छ। उम्मेदवारको विरोधमा उजुरी दिने मंसिर ३ गते र उजुरीमाथि छानबिन मंसिर ४ गते गरिने भएको बताइएको छ। उजुरीमाथिको छानबिनपछि उम्मेदवारको नामावली सोही दिन प्रकाशन गरिने भएको छ।

त्यसैगरी उम्मेदवारको नाम फिर्ता लिने मंसिर ५ गते र उम्मेदवारको अन्तिम नामावली सोही दिन प्रकाशन गरेर उम्मेदवारलाई निर्वाचन चिह्न प्रदान गरिने मुख्य निर्वाचन अधिकृत बरालले बताए।

उपाध्यक्ष पदको उम्मेदवार नेपाली कांग्रेसले आफ्नो उम्मेदवार सविता बुढालाई सर्वसहमत टुङ्ग्याएको भए पनि नेपाल कम्युनिष्ट पार्टी (एमाले) र नेकपा (माओवादी केन्द्र)ले अहिलेसम्म उम्मेदवार टुङ्ग्याएका छैनन्।

प्रकाशित मिति: शनिबार, मंसिर १, २०८१ १३:५५

प्रतिक्रिया दिनुहोस्